Чернобыль һәлакәтен бетерүдә биш Кама Тамагы кешесе хезмәт иткән

Әмма кайбер мәгълүматлар буенча, аварияне бетерүгә безнең районнан 13 кеше җәлеп ителгән, алар башка муниципалитетлардан һәм төбәкләрдән мобилизацияләнгән.

- Беренчеләрдән булып 1986 елда безнең районнан бертуган Рифат һәм Рафаил Әхмәтҗановлар мобилизацияләнде, - дип хатирәләре белән уртаклашты  Владимир Федоров.  Безне – Николай Игонинны, Анатолий Бычковны һәм мине бер елдан – 1987 елның октябрендә мобилизацияләделәр, апрельдә өйгә кайттык. Без Мәскәү хәрби округының химик гаскәрләре бригадасында хезмәт иттек. Бурычыбыз төгәл иде – өченче энергоблокны торгызу.

Химик гаскәр сугышчылары АЭС территорияләрендә һәм объектларында, торак пунктларда һәм юлларда радиоактив пычрануны локальләштерү буенча бурычларын үтәгән. Җимерелгән энергия блогыннан тәүлеклек радиоактив матдәләр чыгаруны контрольдә тоту, 30 километрлы зонада радиоактив пычрануларны анализлау, техниканы, җиһазларны, махсус киемнәрне, саклану чараларын дезактивацияләү һәм шәхси составны санитар эшкәртү үткәрелгән. Радиоактив калдыкларны җыю, вакытлыча саклау, транспортлау һәм күмү гамәлгә ашырылган.

- Николай Игонин тракторда радиация калдыкларын күмүдә эшләде. Мин “ЗИЛ-130”да АРСка юу эремәләре алып килә идем. Эшчеләр башта энергоблок диварларындагы бетонның өске катламын ватып сүттеләр, ватыкларны күмәргә алып киттеләр, ә аннары шланглар ярдәмендә блок диварларын махсус эремә белән юдылар.

Безнең районнан катнашкан биш кешенең хәзер өчесе генә исән – Игонин, Федоров, Бычков. Тагын бер Кама Тамагы егете Владимир Левагин Сургуттан чакырылган.  Ул соңрак районга кайткан, ләкин хәзер ул инде исән түгел.

Чернобыль һәлакәте химик гаскәрләрнең ныклыгына җитди сынау һәм тикшерү булган, аның нәтиҗәләрен бетерү буенча бурычларны үтәү барышында алынган тәҗрибә бәяләп бетергесез. Хәзерге вакытта бу тәҗрибә безнең гаскәрләрнең частьларын һәм бүлекчәләрен әзерләүдә хәлиткеч роль уйный.