Бу гаиләдә Советлар Союзы республикалары кушылган

Язмабыз героеның әтисе Украинада, әнисе Татарстанда туганнар, ул үзе исә Кабарда-Балкар республикасында, аның балалары Куйбышев Затонында, килене Үзбәкстанда, ә оныклары Воронежда дөньяга килгән.

Кырыгынчы елларда әтисенең әти-әнисе Украинадан Кабарда-Балкариягә күчеп килгәннәр һәм андагы бистәләрнең берсенә урнашканнар, хәзер ул – Терек шәһәре. Анда 1940 елда Яков Сторожук армиягә алына, аннан туп-туры фронтка китә. Язмышы аңа илтифатлы була һәм 1946 елда ул өенә кайта, мәхәббәтен очрата, ә бер елдан өйләнә. Хатыны безнең районның Антоновка авылыннан булган – аның гаиләсе авыр елларда Идел буеннан Кавказга күчеп киткән.

Бер елдан соң яшь гаиләдә кызлары Нина туа, бераз соңрак алар Әстерхан өлкәсенә күченәләр, анда уллары туа. 50 нче еллар башында гаилә тормыш иптәшенең туган ягына кайта һәм Кама Тамагында төпләнә.

- Без Южная Околицада яшәдек, мин андагы балалар бакчасына йөрдем, - дип искә ала Нина Яковлевна. - Шунда кайтып, шул бакча булган урынны, урамнарны күрәсем килә. Район газетасыннан әлеге микрорайон турында еш укыйм һәм аны балачактагы кебек итеп күз алдына китерәм.

Соңрак гаилә Чапаев урамыннан торак ала.

- Ни өчендер бу микрорайонны «Колбашки» дип атыйлар иде. Мин кайчандыр бу хакта сорашкан идем, ул вакытта анда өйләрне казылык рәвешендәге баганаларга куйганнар, фундамент ясамаганнар, менә шуңа бистәнең бер өлешен шулай атаганнар. Анда яшәгәндә, мин мәктәпкә укырга кердем. Әти бик яшьли үлде, әни дүрт бала белән ялгыз калды. Икмәк пешерү цехында эшләде, аннары хастаханәгә санитарка булып күчте.

Нина Яковлевна мәктәптән соң учет-кредит техникумын тәмамлаган һәм ике ел Кама Тамагы дәүләт банкында эшләгән. Шунда аны Затон егете күреп алган да инде һәм кәләшен елгачылар бистәсенә алып киткән.

- Мин көнкүреш хезмәте күрсәтү комбинатында озак эшләмәдем, аннары мине эшкә авыл Советы рәисе Борис Михайлович Ефимов чакырды. Аларга бухгалтер кирәк иде. Ул вакытта поселок Советы балансында Затон урта мәктәбе, балалар бакчасы булды, шулай ук безгә Кирельский авылы мәктәбе һәм балалар бакчасы да керде. Бухгалтериядә өч кеше эшләдке, учет алып бардык, педагогларга һәм бистә советы хезмәткәрләренә хезмәт хакы күчердек, хисап тоттык. Кулдан башкара торган эшләре күп булды, әмма без барысына да өлгерә идек.

Нина Куликова поселок советында утыз елдан артык эшләгән. Шушы еллар эчендә өч председатель алышынган, ләкин, әңгәмәдәшем фикеренчә, бистә эшләренә иң җәлеп ителгән кеше Борис Ефимов булган.

Әңгәмәдәшем 40 елдан артык район газетасын алдыра.

- Мин монда үзем өчен мөһим мәгълүматны табам. Күпләр белмим, сорыйлар, ә мин һәрвакыт беләм - табиблар кайчан киләчәк, кайда кабул итәчәкләр, кайчан һәм кайда бәйрәм узачак. Кешеләр турында уку кызык, алар арасында минем танышларым да бар.