Биредә тәҗрибәле механизаторлар эшли

Марат Вафин һәм Ришат Һадиев “КамАЗ”ларда көнбагышны кырдан складка ташый. Алар яшьтән үк авыл хуҗалыгында эшлиләр, тракторны да, комбайнны да, йөк транспортын да яхшы беләләр. Икесе дә Караталдан һәм икесе дә 30 елдан артык стажга ия. Бу бүлекчәдә инде көнбагыш җыеп алынган, Олы Кариледә 400 гектардан җыясы калган. Шуңа күрә хәзер бөтен техника биредә тупланган. 

– Бездә гомуми сөрүлек җире 5000 гектардан артык, - ди «Олы Кариле» ҖЧҖ җитәкчесе Рамил Сабиров. - Төп культуралар – көнбагыш, ашлыкка кукуруз һәм силос, бодай, борчак, арпа. Көзге кыр эшләренә барлык 22 механизатор да җәлеп ителде. Бездә техника ул кадәр үк заманча түгел, коллективыбыз да бик яшь түгел, әмма мәйданнарыбыз азрак. Уңышны без үзебездә туплыйбыз, аннары төп предприятие ашлыкны һәм көнбагышны сату өчен чыгара.

Безнең коллективта тәҗрибәле механизаторлар һәм машина йөртүчеләр эшли, олы яшьтә булуларына карамастан, алар барысы да тулы көчкә хезмәт куя. Хәтта хәзер дә мөмкин кадәр зуррак мәйданда суктырырга ашыгулары күренеп тора. Көзен һава торышы көтелмәгәнчә була, бүген җылы, иртәгә яңгыр.