Батырга Суворов медале тапшырылды

Россия Федерациясе Президенты Владимир Путинның 2024 елның 8 апрелендәге Күрсәтмәсе белән Исрафилов Марат Җәбраил улы Суворов медале белән бүләкләнде.
Марат Исрафилов Куйбышев Затонында суднолар ремонтлау заводында эшләгәндә, без аның турында язган идек. Ул вакытта без кече Ватаныбызда калган яшьләр белән таныштырдык һәм предприятиедә аның җаваплы һәм кирәкле белгеч булуын билгеләп үттеләр.

Марат мобилизациягә кадәр Куйбышев исемендәге флотның ремонт базасында котельный цехында электр белән эретеп ябыштыручы булып эшләгән, ул мәктәптән соң Затон училищесын тәмамлаган һәм белгечлеге буенча – елга флотында рульдәге моторист булып эшли башлаган. Аннары суднолар ремонтлау заводына урнашырга булган, эш урынында өйрәнүләр узган, бер үк вакытта Тәтеш авыл хуҗалыгы техникумында эретеп ябыштыручы белгечлеге алган. 

Хәзер ул Казанда эретеп ябыштыручы булып эшли, фатир сатып алган, аның барысы да яхшы. Дөрес, ярасы үзен сиздерә, сул кулы начар эшли, әмма нигездә эше уң кул белән башкарыла,  шуңа күрә хезмәт куярга һәм акча эшләргә була.

Ә медаль һәм күрсәткән батырлыгы турында ул күп сөйләми: «Без позицияләрне ныгытуда булдык, анда иң мөһиме – алга куелган бурычларны тыныч һәм паникасыз гына башкару. Һәм без моны эшләргә тырыштык, әлбәттә, җиңел булмады...» - ди ул.

Марат елны алгы сызыкта үткәргән, анда үзара ярдәмләшү бик мөһим, Татарстан егетләре үзләренең хәрби бурычларын иңгә-иң куеп үти.

Җитди җәрәхәтне ул 2023 елның октябрь ахырында Польша минометының Россия позицияләре буенча эше нәтиҗәсендә алган. Минаның очканы ишетелми, вакытында качып өлгереп булмый. Ул бик якын очып төшкән, кыйпылчыклар Маратның кулын яралаган, ә янәшәсендәге иптәше һәлак булган. Маратка хезмәттәшләре ярдәм иткән, тиз генә кулын бәйләгәннәр һәм беренче ярдәм күрсәткәннәр: «Безне беренче ярдәм күрсәтергә өйрәттеләр, аптечка һәрвакыт әзер иде. Ә бу юлы үземә ярдәм кирәк булды, тиз арада игътибар итеп, ярдәм күрсәткән якташым, полкташым Рәдиф Сәйфиевка рәхмәт».

Марат билгеләп үткәнчә, вакытында медицина ярдәме күрсәтсәң, вакыт аралыгын саклап, жгутны дөрес куйсаң, яралы сугышчының гомерен һәм сәламәтлеген саклап калырга була. Марат яраланганнан соң хәрби хәрәкәтләрдән азат ителгән, чөнки иңбашындагы нервлары нык имгәнгән. Бер ай хәрби госпитальдә яткан, аннары Мәскәү янындагы хәрби частька җибәрелгән, берничә тапкыр хәрби-табиб комиссиясе узган, санаторийда тернәкләнү үткән, бары 2024 елның августында гына, хәрби хезмәттән азат ителгәннән соң, өенә кайткан.

Әмма ул әле дә күңеле белән иптәшләре янында: «Ялга кайтучылар белән, әлбәттә, очрашабыз, аралашабыз. Ә болай язышабыз, мөмкинлек булганда, шалтыратышабыз. Алар – бик якын кешеләрем, иң тугры дусларым, без бергә күпне кичердек... куелган бурычларны да бердәм үтәдек, көнкүрештә дә эшләрне бүлеп алдык, кем нәрсәне яхшырак булдыра, шуны эшли, анда һәркем файдалы булырга тырыша. Хәрби операция башланганга өч ел вакыт үтте инде, тиздән егетләребез җиңү белән якыннары янына әйләнеп кайтырлар дип өметләнәм».