Барлык белемнәрне эшкә юнәлтеп

Айнур Сафин Әлки районында туып үскән. Аграр университетны тәмамлаганнан соң, туган районында белгечлеге буенча эшли, ә узган ел аспирантураны тәмамлап, Кама Тамагына күченә.

– Югары уку йортында без классик игенчелек системасын өйрәндек, шуңа күрә «Август-Агро» куллана торган яңа технология минем өчен яңалык, мин аны хезмәттәшләремнән, ИК белгечләреннән өйрәнәм.

– Ноу-тилл системасы классикадан нәрсәсе белән яхшырак?

– Классик система буенча эшләүче «Олы Кариле» ҖЧҖ кырлары белән чагыштырганда, безнең басуларда яз көне дым күпкә озаграк саклана, агротехник чараларны иртәрәк башларга мөмкин. Уңыш та бу системаның өстенлекле булуын дәлилли.

– Агрономия хезмәтендә нәрсәләр үзгәрде?

– Быел без ике эремә төенен эшләтеп җибәрдек. Аларның берсе Уразлинода, икенчесе Югары Ослан районында. Тәҗрибә күрсәткәнчә, сыек ашламалар үсемлекләр тарафыннан тизрәк һәм яхшырак үзләштерелә.

Бу ел эчендә тагын 4 мең гектар җир чәчү әйләнешенә кертелде. Өч ел эчендә безнең районда 12 мең гектар җир үзләштерелде. Бүгенге көндә филиалның гомуми сөрүлек мәйданы 55 мең гектар тәшкил итә.

– Урып-җыю кампаниясе ничек бара?

– Кама Тамагында урып-җыю тулысынча тәмамланды. Хәзер бөтен техника Югары Осланда тупланган – көнбагыш җыю тәмамланып килә.

– Урып-җыю эшенең нәтиҗәләре нинди?

– Сабан бодае 37 ц/га, уҗым бодае 39 ц/га, рапс 13 ц/га (рентабельлек 6 ц/га булганда), көнбагыш 20 ц/га (рентабельлек 12 ц/га) җыеп алынды. Быел без туфракның сыйфатын яхшырту өчен чәчүгә борчак керттек. Техник культуралар һәм борчакны тулысынча гамәлгә ашырдык.

– Әлки районыннан соң Кама Тамагы ничек сезгә? Өйгә кайтасы килмиме?

– Юк, миңа биредә ошый. Предприятие безгә яшәп торырга фатир бирде, шуңа күрә без хатыным һәм балам белән бернинди уңайсызлыклар сизмибез. Эш тотрыклы һәм, иң мөһиме, кызыклы. Монда озакка калырбыз дип уйлыйм.