Авыл: эчтән караш

Сөйкидә авыл көне алдыннан сигезенче сайлау округы зур әзерлек эше үткәргән иде. Авыл җирлеге депутаты Василий Никитин моның өчен төзелгән комиссия белән берлектә үз округы хуҗалыкларын карап чыга. Комиссия киләчәкне алдан белгән халык, өй яннарын һәм участокларын җыештырып куйган. Һәр йорт комиссияне нәрсә белән булса да гаҗәпләндерергә тырышкан. Кемдер матур чәчәклеге, кемдер бакчасы, кемдер гадәти булмаган үсемлекләре белән. Мәсәлән, Кругловлар хуҗалыгында көнкүреш чүп-чарына лаеклы кулланыш табылган. Иске пыяла шешәләрдән теплица өчен цоколь ясаганнар. Депутат һәм эколог Василий Никитинга бу идея бик ошады.

-Беркемне дә аерып тормадык, чөнки барысы да тырышкан, - ди Василий Павлович, - Күршеләрне каравы үземә дә кызык булды, күп яңалык күрдем. Хәтта үз бакчаң күршеләр ягыннан икенче төрле күренә икән.