Аналар һәм балалар сәламәтлеге сагында

Кырык елдан артык хезмәт гомерен иң игелекле һөнәрләрнең берсенә – акушерлыкка багышлаган ул. Малаевка авылында 7 балалы гаиләдә туып-үскән кыз, Затондагы урта мәктәпне тәмамлагач, табиб булу хыялын тормышка ашыру өчен, Казанга китә. Казан медицина училищесына укырга керә һәм, акушер һөнәренә укып, ике ел ярымнан туган районына кайта, гәрчә башкалада калу мөмкинлеге булса да. 

Аның хезмәт биографиясе Яңа Сала фельдшер-акушерлык пунктында башлана, аннары Олы Карамалда дәвам итә, анда үз карамагындагыларга битараф булмаган, эшенә җаваплы караучы яшь хезмәткәргә игътибар итәләр һәм район үзәк хастаханәсенең бала тудыру йортына эшкә чакыралар. Шул вакыттан бирле – 1976 елның 1 гыйнварыннан – Вера Ивановна үзенең җитез һәм эш сөючән кулларында беренче авазларын салган сабыйларның һәм аларның әниләренең сәламәтлеге сагында армый-талмый хезмәт куйган.

– Хезмәт дәверемдә берничә тапкыр игезәкләр дә дөньяга килде, кайчандыр минем ярдәм белән туган балалар үсеп җитеп, инде үзләренә бала тудыруда ярдәм иткәнем булды, - дип искә ала язмабыз герое. - Ата-аналар да, балалар да исәнләшмичә үтеп китмиләр – бу да күңелле, димәк, хезмәтем юкка булмаган…

Вера Ивановна яңа туган балаларның сәламәтлекләрендә кимчелекләр белән туган чакларны, бар һөнәрилекне генә түгел, кешелеклелек тә күрсәтергә кирәк булган катлаулы очракларны да искә төшерә. Ул табиб-гинеколог Мария Ивановна Нежинскаяны рәхмәт белән искә ала, бу табиб аны күп нәрсәгә, беренче чиратта, үз карамагындагыларга карата ихтирамлы булырга өйрәткән.

Әмма иң мөһиме, әңгәмәдәшем, лаеклы ялга чыккач та, үзен әти-әниләреннән мәхрүм калган оныкларын тәрбияләүгә багышлаган, ул алар өчен әни дә, әти дә. Вера Ивановна оныклары белән бер ритмда яши. Олы оныгы Валерия быел Апас көллиятенә укырга кергән, пешекче-кондитерга укый, Антон һәм Егор кадет мәктәбендә белем алалар.

– Валерия укырга кергәч, беренче курс студентларын кабул итүгә багышланган көнне Апастан аның сыйныф җитәкчесе шалтыратты һәм чарада актив катнашкан оныгымны мактады, - дип горурлык хисе белән сөйли әңгәмәдәшем.  – Ул анда гитарада да уйнаган, җырлаган да. Энесе Антон белән 5 ел музыка мәктәбенә йөрүләре юкка гына булмаган, димәк. Антон Буада узган музыка фестивалендә III дәрәҗә лауреат дипломына лаек булды. Егор да ике ел музыка мәктәбенә йөрде.

Аның оныклары сәнгатьтә генә түгел, спортта да активлар: бадминтон белән шөгыльләнәләр, район күләмендә генә түгел, Россия күләмендә дә спорт ярышларында катнашалар.

Вера Ивановна газетабызны күп еллар дәвамында алдыра, бу юлы ул бүләк уйнатуда җиңүче булды, без аларның гаиләсенә сәламәтлек, теләкләренең тормышка ашуын һәм иминлек телибез!