Аларның төп бурычы – үз карамагындагыларда өмет уты кабызу

Биредә үз карамагындагылар һәм эше турында сөйләшү өчен социаль хезмәткәр Оксана Михайлова белән очраштык.

Безнең аның турында газета битләрендә язганыбыз, социаль хезмәтләрдән файдаланучы җирле халык белән очрашканыбыз бар. Алар барысы да социаль хезмәт буенча ярдәмне бик уңай бәяли һәм Оксана Васильевнаның эше турында җылы фикерләрен әйттеләр,  өлкән яшьтәге кешеләр сүзләренчә, ул инде аларның якын кешеләренә әверелгән. 
Бу көтмәгәндә килүебездә без аны үз карамагындагыларның берсенең өендә очраттык. 

Надежда Иванова пенсиядә, аның янына социаль хезмәткәр атнага өч тапкыр килә. «Барысы да яхшы, Оксана игътибарлы һәм игелекле. Ул кибеттән азык-төлекләрне дә алып кайтып бирә, коммуналь хезмәтләр өчен түләргә ярдәм итә, беркая да барырга кирәкми. Аркам авыртып, бер ай урын өстендә яттым, хәзер әкрен генә йөрим, ләкин сумкалар белән ерак бара алмыйм, шуңа күрә ярдәмчем миңа бик булыша, килеп җыештырып китә, табынымда һәрвакыт яңа пешкән ипи, кирәк булганда, дарулар да сатып алып кайта. Аңа зур рәхмәт!» - ди Надежда Владимировна. 

Элегрәк инде берничә ел социаль хезмәткәр ярдәменнән файдаланучы Михаил Хохлов турында сөйләгән идек. Михаил Иванович Оксана турында бик җылы фикердә: «Ул бик игътибарлы, зур ярдәм күрсәтә һәм кешеләргә күңел җылысын кызганмый», - ди ул.

Без аның авырткан аяклар белән поселок буйлап йөри алмавы, кибеткә чыгу да зур проблема булуы, азык-төлекне Оксана Михайлова китерүе, аның үтенече буенча кирәкле әйберләр сатып алуы турында язган идек. 

Оксана Васильевна узган ел аның аяклары йөрми башлавы, бөтенләй өйдән чыкмавы, әмма физик күнегүләр ярдәмендә һәм ярдәм булганга, үзен яхшырак хис итә башлавы, инде урамга чыгуы турында әйтте. Социаль хезмәткәр фикеренчә, бу аларның уртак зур җиңүе! 

Элек Михаил Ивановичка иске өйалды баскычын сүтеп, яңасын төзергә булышканнар, хәзер йортның түбәсен япканнар, көзен йортны газга тоташтырырга планлаштыралар, хәзер пенсионерның тормышы күпкә уңайлырак булачак, һәм аңа көнкүрештә  хезмәт күрсәтү күпкә җиңелрәк булачак, чөнки кыш көне Оксана Михайловнага көненә ике тапкыр мичкә ягарга туры килгән. Аның тормышындагы үзгәрешләр һәм уңышлары турында сөйләгәндә, ул шатлыгын яшерми. 

Битарафлык аңа хас түгел, ул һәркем өчен җан атып тора, еш кына өстәмә хезмәтләр күрсәтә, ә алар аның вазифа бурычларына керми, боларга бакчадагы уңышны җыю һәм эшкәртү, йортка косметик ремонт ясау, өлкән яшьтәге кешеләрнең көнкүрешендә уңайлыклар булдыру һәм башка күп нәрсәләр керә. Аның игелеклелеге, сабырлыгы, кешеләргә булган мәхәббәте уңышлы эшләргә мөмкинлек бирә.

Оксана Михайлова хезмәт эшчәнлеген 1995 елда «Красный Маяк» КПсында сыер савучы булып башлаган. 1998 елдан хәзерге вакытка кадәр Оксана Васильевна Кама Тамагы муниципаль районының «Богородский рай» үзәгенең өйдә социаль хезмәт күрсәтү бүлегендә социаль хезмәткәр булып эшли. 

«Ул зур эш тәҗрибәсенә, гамәли белемнәргә һәм күнекмәләргә ия, Сөйки авылында социаль өлкә барлыкка килүгә һәм аны үстерүгә шактый көч куйган, вакытында сыйфатлы социаль хезмәт күрсәтә, өйдә хезмәт күрсәтү өлкәсендә алдынгы тәҗрибә туплый һәм аны үз эшенә кертергә тырыша, даими рәвештә квалификациясен күтәрә”, - дип язылган аның характеристикасында. 

Оксана Владимировнага уңышка ирешүдә толерантлык, сабырлык, ярдәмчеллек, кешеләрне ярату кебек шәхси сыйфатлары булыша. Үз карамагындагылар белән җай белән һәм әдәпле итеп аралаша, ул бик тыйнак һәм тырыш кеше. 

Оксана Васильевна күп тапкырлар район башлыгының Рәхмәт хатлары, социаль яклау идарәсенең Мактау грамоталары белән билгеләп үтелде, ә 2021 елда ул Казанга чакырылып, анда ТР Министрлар кабинетының Рәхмәтенә ия булды. Ваемсыз булмаган һәм җаваплы хезмәткәрләрнең фидакарь хезмәтләре бәяләнүе сөендерә.