Район экоактивистлары форумда

Анда экологик отрядларның, мәктәп урманчылыкларының актив әгъзалары, олимпиадалар һәм конференцияләр җиңүчеләре, «Чиста булачак» төбәк яшьләр иҗтимагый оешмасы активистлары, педагоглар һәм студентлар катнашты.

Безнең районны ике мәктәп: кадет һәм Рудник мәктәпләре тәкъдим итте.

Балалар кызыклы мастер-классларда, тәҗрибәләрдә, «Экосер» квизында катнашты. Укытучылар гамәли һәм теоретик тәҗрибәләре белән уртаклашты, бер ел эчендә башкарылган эшләр турында сөйләделәр, үз проектларын тәкъдим иттеләр. Форум ахырында тантаналы бүләкләү булды. 

Кама Тамагы кадет мәктәбе укучылары Артем Лыкин һәм Дарья Островидова «Табигатьне саклау һәм хәйрия акцияләренә зур өлеш керткән өчен» номинациясендә дипломнар һәм кыйммәтле призлар белән бүләкләнделәр. Аларның педагоглары Ольга Ларионова да игътибардан читтә калмады. Аңа «Эко-тәрбия» номинациясендә диплом һәм балалар белән эшләү өчен методик җыелма тапшырылды.

Рудник мәктәбе укучылары Рамил Миңнегалиев һәм Валерия Мокшинага җиңүче дипломнары һәм кыйммәтле  бүләкләр тапшырылды.

– Мин актив рәвештә экология белән мавыгам, мәгълүматны өйрәнгәндә, файдалы гадәтләр барлыкка килә. Мәсәлән, батарейкаларны, пластикны аерым җыям. Хәтта кечкенә генә лайфхак барлыкка килде – шешә капкачларын җыеп куям, «Чиста уеннар»га кадәр аларны велошредерда эшкәртәм. Капкачтан уникаль брелок яки значок ясау өчен педальләрне әйләндерергә кирәк, - ди Артем. - Форумда минем өчен иң истә калганы апсайклинг буенча мастер-класс булды.  Шөгыльнең асылы – иске әйберләргә яңа тормыш бирү. Барысы да чигү яки рәсем төшерү өчен курткалар сайлады, ә мин махсус киемнәр арасыннан чалбар табып алдым һәм аны буядым. Бу чалбарны киеп, шулай ук үземнең табигатькә битараф булмавымны күрсәтә алам. Минемчә, бу бер дигән вариант өмәләр өчен генә дә түгел. Мастер-класс югары дәрәҗәдә оештырылган иде: җиһазлар, материаллар, файдалы мәгълүмат һәм укучыларга мөнәсәбәт – болар барысы да миңа бик ошады.

Дарья Артемның табигатькә мөнәсәбәтен һәм дөрес гадәтләр формалаштыруын хуплый:

– Минем йортым Идел буенда урнашкан, шуңа күрә еш кына кешеләрнең, ял иткәч, үзләреннән соң җыештырмаулары күзәтелә. Минем өчен үзем яшәгән җирнең чиста булуы мөһим, шуңа күрә биредә чүп-чар калдырган башка яшүсмерләр артыннан җыештыру миңа авыр түгел, моннан тыш яр буен җыештыру өмәләрендә дә актив катнашам. Күпләр кебек үк, мин дә чүп-чарны – пластикны, пыяланы һәм ризык калдыкларын аерым утильләштерергә тырышам. Мин моны үзем эшлим, әти-әнием, әлбәттә, миңа һәрнәрсәдә булышалар, ләкин сортларга аерырга алар әлегә әзер түгел. Бу безгә тирә-юнебезне пычракка батырмаска ярдәм итә торган кечкенә адымнар. Моны беркем дә эшләмәгәнче, кемнең дә булса эшләве яхшырак.