Юрьев мәгарәсендә спорт туризмы

Ярышларның инициаторлары - район спорт мәктәбенең туризм буенча секциясе һәм Ульяновскиның «Горизонт» клубы.

7 май көнне «Юрьев мәгарәсе» махсус сакланыла торган табигать территориясенә командалар кереп, өйрәнү күнегүләре үткәрделәр. 8 майда кыяларда Кама Тамагы районы беренчелеге ярышлары узды, ә 9 майда - спорт туризмының тау техникасы буенча Чемпионаты.

Ярышларда Казан, Ульяновск һәм Кама Тамагы командаларыннан барлыгы 30 дан артык спортчы катнашты.

"Адымнар" клубы командасын ярышларга өстәмә белем бирү педагогы, спорт туризмы буенча спорт мастерлыгына кандидат, тау туризмы инструкторы Мифтахова Галина Иннокентьевна алып килгән иде.

Галина Мифтахова 20 елдан артык Юрьев мәгарәсе территориясендә спорт лагере сменаларын оештыра.  Тауга менү спорт төрен яратучыларның бер генә буынын тәрбияләмәгән. Әлеге ярышларда ул шулай ук өлкән судья вазыйфаларын да башкарды.

- Мин 2000 елдан бирле монда үсмерләрне алып киләм, биредә лагерь һәм күнегүләр оештырам. Юрьев мәгарәләре территориясен караганга, район җитәкчелегенең моңа зур игътибар бирүенә бик шатмын. Безнең спорт клубы спорт туризмы буенча ярышларда бик теләп катнаша.

Ульяновскиның "Горизонт" спорт клубы командасын ярышларга Василий Сапрыкин алып килде.

Василий Сапрыкин, Россиянең спорт мастеры, өлкән инструктор, өлкән гид-озатучы, өлкән укытучы һәм Россиянең атказанган сәяхәтчесе, шулай ук "Горизонт" балалар спорт клубы башлыгы, 50 елга якын гомерен туризм өлкәсенә багышлаган кеше.

- Мин бу спорт төрен яратам һәм аның белән яшьләр шөгыльләнүен телим. Без тауларга йөрибез, елгалар буйлап йөзәбез, походларны һәм актив ялны бик яратабыз.

Кама Тамагы командасын спорт мәктәбе тренеры Николай Егоров җитәкләде.

Спорт туризмының тау техникасы белән Галина Мифтаховада шөгыльләнә башлаган.

- Бездән ярышларда 12 яшьтән 16 яшькә кадәрге укучылар катнашачак. Лаеклы, тәҗрибәле көндәшләребез булуына без шат, шуның белән ярышлар кызыклырак булачак.

- Чемпионат беренчелектән нәрсәсе белән аерыла?

- Чемпионатта команда данын яклап, яше 14тән узган спортчылар катнаша, - ди Галина Мифтахова. - Беренчелектә 12 яшьтән башлап катнашырга мөмкин, ярышлар яшь категорияләре буенча уза.

- Ярышларда катнашучының иң кечкенәсенә ничә яшь?

- 11 яшь, гәрчә, бу чыгарма.

Ульяновскидан Александр Занкин өч ел спорт туризмы белән шөгыльләнә.

- Миңа ошый, без биредә кыяларга менәргә генә түгел, гомумән физик әзерлеккә һәм башка күнекмәләргә өйрәнәбез.

Дмитрий Гаврилов секциядә 6 сыйныфтан бирле.

- Дустым белән килгән идем, шулай калдым да, инде өч ел шөгыльләнәм.

Евгения, бер спортчының әнисе, сүзгә саран булмады.

- Башта улымны алып килдем, тыныч булсын өчен үзем дә походларга йөрдем. Ә аннары Василий Павлович үземне сынап карарга тәкъдим итте. Бераз куркыныч булса да, мин соңыннан күнектем, кыяларга менәргә өйрәндем. Моннан тыш, без җәяүле һәм су туризмы белән шөгыльләнәбез, Сура, Зөя елгалары буйлап байдаркаларда йөзәбез. Җәй көне төркемнәр җыябыз, июньдә Кавказга, августта Алтайга, кем кайчан чыга ала. Бездә спорт тормышы кайнап тора.

- Мин ярышлар нәтиҗәләреннән бик канәгать, - ди Николай Егоров. - Безнең егетләр күп кенә дисциплиналар буенча иң яхшылар булып чыкты.

Ике яшь категориясенең беренчелегендә беренче урыннарыбыз бар, өлкәннәр категориясендә егетләр арасында Казан командасы безне узып китте.

Чемпионатта безнең команда шулай ук иң яхшысы булды.

- Бәлки, сезнең өстенлек - кыяларның якында булуы һәм сезнең күбрәк шөгыльләнә алуыгыздадыр?

- Юк, Ульяновск һәм Казан спортчылары да биредә еш була һәм шөгыльләнәләр, шуңа күрә шартлар барысының да тигез. Иң кечкенә яшь төркемендәге кызлардан бик канәгать – Дарина Сергеева һәм Диләрә Гобәйдуллина үз дистанцияләрен бик яхшы эшләделәр. Барлык катнашучылар да лаеклы чыгыш ясадылар, афәрин аларга!