Ни өчен сезон уңышсыз булган

«Кама» командасы футбол буенча Татарстан Республикасы Беренчелеге кысаларында бу сезонда 14 матчта катнашты һәм бары тик берсендә генә Байлар Сабасы командасын җиңүгә иреште.

Футболчыларыбызның тагын бер матчта уйныйсылары бар. Соңгы уенны алар 1 октябрьдә Түбән Кама “Нефтехимик”ы белән үз кырларында уйнаячак.

24 сентябрьдә «Кама» Нурлат шәһәрендә узган матчта катнашты һәм уен мәйданчык хуҗалары файдасына 2:0 исәбе белән тәмамланды.  «Факел» командасы өчен бу сезонда соңгы уен булды, алар аны биш җиңү, ике тигез очколар һәм җиде җиңелү белән тәмамлады. “Нефтехимик»ка сезон өч җиңү, ике тапкыр тигез очколар һәм тугыз җиңелү китерде, безнең футболчылар кебек үк, команданы сезонның соңгы матчы көтә.

Быелгы сезонның безнең футболчылар өчен ни өчен уңышсыз булуы турында тренер Ришат Ханановтан сорадык.

Нәрсәгәдер яшәргә кирәк

«Команда әгъзаларының барысы да диярлек студентлар, ә аларга укыган чорда нәрсәгәдер яшәргә дә кирәк. Шуңа күрә егетләр, күнекмәләргә йөрү һәм укудан буш вакытта эшләү арасыннан икенчесен сайлыйлар. Бу күнекмәләргә йөрмәү, уеннан баш тарту дигәнне аңлата.

Мин дә өлкәннәр командасы тренеры булып җәмәгать нигезендә эшлим, ягъни моның өчен хезмәт хакы алмыйм. Башка районнардагы хезмәттәшләремнән аларда бу эшнең ничек куелуы белән кызыксындым һәм күбесенең тренерлык эше өчен яшьләр үзәкләре аша түләү алуы ачыкланды. 

Әлбәттә, мин дә, спортчылар да командабызның иганәчесе – Кама Тамагы гипс руднигына рәхмәтле. Предприятие ярдәме белән безнең ярышларга йөрү һәм хәтта командировка түләүләре алу мөмкинлеге булды. Бездә рудник логотибы төшерелгән яңа форма барлыкка килде. Болар барысы да сөендерә, әмма бүген бер энтузиазм белән генә әллә ни майтарып булмый. Спортчылар вакытларын һәм көчләрен сарыф итәргә теләми. Нәтиҗәдә көчле уенчылар бу мәсьәлә уңай хәл ителгән клубларны табалар. Без, әлбәттә, бу сезонны тәмамлаячакбыз, әмма киләсе сезонга заявка бирмәячәкбез, мин команданы җыя алмаячакмын”.

Саннар һәм фактлар

«Футбол буенча ТР Беренчелеге 1 лига» сайтында безнең команданың көндәш командалары составын бәяләргә була. Түбән Каманың «Нефтехимик» командасында 40 спортчы һәм 2 тренер, Нурлатның «Факел» командасында 32 футболчы һәм 2 тренер, Чистайның «ТрудМ» командасында 33 уенчы һәм 2 тренер, Казанның «Восход» командасында 30 уенчы һәм 5 тренер, Яшел Үзәннең ике командасында 36 шар футболчы һәм икешәр тренер бар. Шул ук вакытта «Восход» футболчыларының төп өлешендә уен вакыты 30 минуттан 600 минутка кадәр, һәм бары тик дүртесендә генә ул 1000 минуттан артып китә.

«Кама» командасында 28 уенчы һәм бер уенчы-тренер бар. Димәк, спортчыларга да, тренерга да йөкләнеш бик югары. Безнең актив футболчыларыбыз – Артур Закеян, Олег Иванов, Тимур Лысачкин, Даниил Макаров, Станислав Нестеров, алар уенда 900 минуттан артык вакыт үткәргән, Алан Ханановның уен вакыты 1000 минуттан артып китә.

Нурлатка барыр алдыннан ике әйдәп баручы уенчы авырып киткән. Берсе сәфәрдән баш тарткан, икенчесе –  әтисе кебек үк футбол фанаты Алан Хананов уенда катнашырга булган.

Узган ел команда төркемдә икенче урынны алган. Команда уенчысы Артем Емелин нәтиҗәлелек буенча дүртенче урында, сезон эчендә 16 гол, шул исәптән 6 пенальти керткән. Тагын өч уенчыбыз турнирның статистика таблицасының югары  өлешендә – Эмиль Садретдинов (4 гол), Владимир Семенов (3), Алан Хананов (3). Быел әлегә нәтиҗәләр ясалмаган, әмма уен нәтиҗәләре үзләре үк әйтеп тора.

Этәргеч булу кирәк

 «Әгәр акча табып, уенчыларга җиңү матчлары өчен түләсәң, нәтиҗә бөтенләй башка булыр иде», - дип саный тренер. -Футбол буенча беренчелек әле тәмамланмады, ә октябрьдән мини-футбол буенча Казан шәһәре беренчелеге башлана. Ул майга кадәр дәвам итәчәк, һәр команда 25 әр матч уйнаячак. Район абруе өчен генә кирәк нәрсә түгел, егетләр футбол уйнарга тели, һәм без бу уеннарга үз хисабыбызга барабыз. Шунысы яхшы –  футболчыларның күпчелеге студентлар һәм алар барысы да Казанда, шуңа күрә биредәгеләр минем машинага да сыя. Бу ярышларда 17 яшьтән өлкәнрәк спортчылар катнаша.

Катнашмау бик кызганыч. Бездә күнекмәләр өчен барысы да бар – республикадагы иң яхшы футбол кырларының берсе, душ бүлмәләре, җылы киенү бүлмәләре, әмма иң мөһиме – уйнарга теләге булган егетләр».

Яшь алмашлар

Җомга көнне стадионда балалар командасы күнегүләр үткәрде. Без футбол секциясендә яшь буенча 7 төркем булдырылганын ачыкладык, аларның һәрберсендә 1 сыйныфтан башлап 15-18 укучы шөгыльләнә. Барысы да диярлек Кама Тамагы урта мәктәбе укучылары. Шөгыльләрне ике тренер – Евгений Шалдыбин һәм Ришат Хананов алып бара.

Сүз уңаеннан, футбол белән шөгыльләнә башлаган беренче сыйныф укучылары беренче елда ук район турнирларында катнаша. Җиңелгәч, малайлар чын күңелдән елыйлар, ләкин һәр уен белән аларның осталыгы, тәҗрибәсе арта һәм ел ахырында алар көндәшләре белән көрәшү өчен мәйданга ышаныч белән чыга.

Сентябрьнең җылы кояшы астында заманча стадионда малайлар футбол уйный. Алар инде өченче ел Ришат Ханановта шөгыльләнәләр.

«Яхшы егетләр, уен белән мавыгалар, көчләрен кызганмыйлар, ничек тә җиңәргә тырышалар, - ди тренер алар турында. -Алар арасында иң актив һәм нәтиҗәлеләре Сергей Шәрәфиев, Денис Матюха, Иван Ежов, Радель – барысы да булдыра, барысы да тырыш”.

17 сентябрьдә Сергей Шәрәфиев «Рубин» һәм «Зенит» командалары матчы алдыннан «Рубин» уенчыларын мәйданга чыгаручы укучылар төркеменә эләккән.

«Футбол секциясендә беренче сыйныфтан бирле шөгыльләнәм, - ди Сережа. - Миңа бу спорт төрендә тизлек, ярыш рухы ошый. Җиңү дә бик күңелле. Командада дусларым бар. «Рубин» өчен чыгаручы булырга әзерләнгәндә, Данил исемле малай белән таныштым, ул да мәктәп укучысы, футбол белән мавыга. Зур стадионга чыгу бик дулкынландыргыч булды, хәтта кулымнан тоткан уенчының фамилиясен дә күрә алмадым. Ләкин мин моны мәңгегә истә калдырырмын һәм яхшы футболчы булырга тырышырмын”.Яшь футболчылар әнә шундый хыяллар белән яна. Алар чынга ашармы – вакыт күрсәтер.