Район тарихы битләреннән: кулланучылар кооперациясе һәм аның хезмәткәрләре

1997-2017 елларда кулланучылар җәмгыятен җитәкләгән Нина Колчина хезмәт биографияләре район кулланучылар кооперациясе системасы белән тыгыз бәйләнгән кешеләр турында сөйләде.

Республиканың атказанган сәүдә хезмәткәре

«1974 елда Кама Тамагы район кулланучылар берлеге район кулланучылар җәмгыяте – РайПО итеп үзгәртелде, аңа универмаг, продмаг, Кама Тамагы, Сөйки, Олы Кариле, Каратал, Тәмтедәге ваклап сату предприятиеләре, икмәк комбинаты, район азык-төлек әзерләү конторалары, җәмәгать туклануы берләшмәсе, автохуҗалык керде, – дип хәбәр итте Нина Михайловна. - Ә 1974 елның гыйнварыннан 1984 елның августына кадәр РайПОга Миңнеһади Әүхәди улы Мингалиев җитәкчелек итте...».

Тумышы белән ул Буа районының Яңа Суыксу авылыннан. Унбиш яшендә, 1950 елда, туган районының «Татарстан» колхозында эшли башлаган. ФЗӨ (фабрика-завод өйрәнчеге) мәктәбен тәмамлагач, Идел йөк пароходлыгы судноларында кочегар һәм машинист ярдәмчесе булып эшләгән. Армия хезмәтеннән соң аның бөтен хезмәт биографиясе кулланучылар кооперациясе белән бәйле була. Башта авыл кибетендә сатучы булып эшли башлый, аннары Буа районы кулланучылар берлегенең шәһәр яны авыл җирлеге идарәсе рәисе урынбасары була, Буа РПС чәйханәсе мөдире урынбасары, товар белгече һәм янә шәһәр яны авыл җирлеге идарәсе рәисе урынбасары булып эшли. 1968 елдан Миңнеһади Әүхәди улы азык-төлек комбинаты директоры, аннары район кулланучылар берлегенең сәүдә бүлеге мөдире була. Читтән торып «Сәүдә икътисады» белгечлеге буенча совет сәүдәсе институтын тәмамлый һәм 1974 елда Кама Тамагы районы кулланучылар җәмгыяте идарәсе җитәкчесе итеп билгеләнә. Авылда кооператив сәүдәне оештыруга һәм үстерүгә керткән зур өлеше, халык файдасына башкарган уңышлы эшәнлеге өчен аңа «Татарстан Республикасының атказанган сәүдә хезмәткәре» исеме бирелгән, шулай ук намуслы һәм күпьеллык хезмәте өчен ул «Хезмәт ветераны» медале белән бүләкләнгән. 

Районның ярдәмче хуҗалыгында хезмәт куйган

Газетабызның даими укучысы һәм бистәбез тарихы турындагы очерклар авторы – Кама Тамагында яшәүче Иван Маховик хатирәләреннән:

«1982 елның октябреннән 1983 елның августына кадәр миңа Кама Тамагы районы кулланучылар җәмгыятендә эшләргә туры килде. 1983 ел башында РайПОга Польша Халык Республикасыннан хат килде.  Хатның авторы үзенең сугыш елларында Кама Тамагы районы кулланучылар җәмгыятенең ярдәмче хуҗалыгында эшләгәнен язмача раслауны сораган. Җитәкчелек кушуы буенча оешманың барлык хезмәткәрләренең шәхси эшләрен тикшерергә туры килде, ә андый эшләр йөздән артык булып чыкты. Ул елларда архив кулланучылар җәмгыяте территориясенә керү юлында урнашкан складта иде. Кызыл кирпечтән салынган бу  бина бүгенгәчә сакланган. Гыйнвар салкынында өч көн эчендә бөтен эшләрне карап чыгарга туры килде. Полякның шәхси эшен таптык (кызганыч, фамилиясе онытылган).  Ул 1939 елның 18 сентябрендә Көнбатыш Украина һәм Көнбатыш Белоруссия территориясенә Кызыл Армия үтеп кергәннән соң, СССР территориясенә эләккән качаклар исәбеннән булып чыкты. Сугыштан соң ул туган ягына кайтып киткән. Кирәкле документны аңа җибәрдек».

Кулланучылар җәмгыятендә хезмәт сөючән кешеләр эшләгән

«Архивны караганда, миңа Кама Тамагында яшәүчеләрнең шәхси эшләре дә очрады, - дип сөйләвен дәвам итте Иван Петрович. - Ушаков Василий эшен күрдем: ул сугыш елларында автомобиль йөртүче булып эшләде. Күршеләрем Федор Кузьмич һәм аның хатыны Татьяна Григорьевна Севастьяновлар сугыш чорында сатучы булып эшләделәр. Тагын бер күршем Александра Лабзова шулай ук икмәк кибетендә сатучы булып эшләде. Бу хезмәт сөючән хатынны без яхшы белә идек һәм аның гаҗәеп физик көченә гаҗәпләнә идек. Ул бездән өч йорт аша югарырак урамда торды. Менә шул бик үк яшь булмаган хатын җәй көне яшелчә түтәлләренә сибәр өчен Иделдән кырык көянтә су ташый иде. Минем әти-әнием, башка күршеләребез дә, Иделдән ташыган сулары көненә алты көянтәдән артмый иде, ә Александра Лабзова көн дә 800 литрга якын ташыды.

Мөгаен, аның оныкчыгы Леонид Лабзов озак еллар дәвамында алтынчы номер астында «Ак Барс» сакчысы булуы очраклы түгелдер һәм 1998 елда ул әлеге хоккей клубы составында Россия чемпионы булды.

Мин шәхсән белгән бу кешеләр барысы да – Севастьяновлар, Лабзовлар – сугыш елларында кулланучылар җәмгыятендә хезмәт куйдылар...».                   

Дәвамы бар...