Чорлар аша: Ишемдә балалар йорты ачыла

1944 ел... Сугыш бара, инде дүртенче ел “похоронка” кәгазьләре килә, ятим балалар саны арта.  Безнең алда – язу машинкасында җыелган Кама Тамагы район Советы башкарма комитеты депутатлары, Татар АССР хезмәтчәннәренең 1944 елның 7 сентябрендәге утырышы беркетмәсе. Утырышка Лазарев рәислек иткән, секретаре Гатауллина булган (исеме, әтисенең исеме күрсәтелмәгән). Утырышта авыл хуҗалыгы әзерлекләре буенча карарлар кабул ителгән, 1945 елга маляриягә каршы көрәш буенча план расланган, ә Ишем мәктәбе, укучылар саны аз булу сәбәпле, башлангыч мәктәп итеп үзгәртелгән.

Көн тәртибендәге алтынчы пунктта Кама Тамагы районында балалар йорты ачу мәсьәләсе каралган. Ул чакта, 1944 елның сентябрендә, түбәндәге карар кабул ителгән: 1/ райондагы ятимнәр санын һәм алар өчен шартлар булдыру кирәклеген исәпкә алып, Ишем авылы мәктәбе бинасында 100 балага исәпләнгән балалар йорты оештырырга. 2/ район Советы Башкарма комитеты рәисе урынбасары иптәш Большаковка балалар йорты оештыруда гамәли ярдәм күрсәтү эшен йөкләргә. 3/ Иптәш Фроловага балалар йорты өчен тиешле кадрлар табуны һәм балалар йортын 1 октябрьдән дә соңга калмыйча ачуны йөкләргә.

Һәм менә инде сканерланган архив документлары ярдәмендә без 45 нче балалар йорты буенча боерыклар дәфтәрен ачабыз, ул 1944 елның 27 сентябрендә Ишем балалар йорты буенча беренче боерык белән башлана: «Мөхәммәтҗанов Гарәф Шәйхетдин улын Кама Тамагы районы Ишем авылында яңа ачылган балалар йортының хуҗалык буенча директор урынбасары итеп билгеләргә. Ишем авылы балалар йорты директоры Арысланов».

Киләсе боерыкларда дежур няня (Сибагатуллина Гадилә), тәрбияче (Сибагатуллина Салиха), хезмәт буенча инструктор (Ихсанов Гарәф), кастелянша-кладовщик (Насыйбуллина Җиһан), аш-су остасы (Йосыпова Сара) билгеләнә, шулай ук кер юучы, мичкә ягучы, җыештыручы, ишегалды җыештыручы-сакчы, түгәрәк җитәкчесе, тегү-кул эшләре буенча хезмәт инструкторы, бухгалтер эшли башлый…

Күргәнебезчә, өч атнадан балалар йорты ачу турындагы карар үз көченә керә һәм Ишем авылындагы учреждение ятим балалар өчен шартлар булдыруга керешә.