Кама Тамагы укучылары Актанышта фәнни-эзләнү конференциясендә катнашты

Бу чарага 400дән артык эш җибәрелеп, 91 эш икенче турга сайлап алынды. Шул эшләр арасында безнең районнан да ике укучыбызның эше бар. Кама Тамагы урта мәктәбеннән 9 сыйныф укучысы Наилә Хананова (җитәкчесе Рушания Хәйруллина) "Мөхәммәт Мирза иҗатының тәрбияви әһәмияте" темасына һәм Затон урта мәктәбеннән 7 сыйныф укучысы Раил Вилков (җитәкчесе Эльвира Лизунина) "Мөхәммәт Мирза иҗатын өйрәнү юнәлешендәге иҗади проектлар-презентацияләр секциясендә "Биш юлым-биш гөлем" темасына эш җибәреп, чакыру хаты алдылар. Безнең укучыларыбыз шушындый ерак юлны узып, җиңү алып кайттылар. Раил lll дәрәҗә җиңүче дипломына, Наилә дипломга ия булды. Мөхәммәт Мирза белән очрашу һәркемдә җылы хисләр калдырды. Укучылары белән алны-ялны белмичә эшләгән укытучыларына һәм районыбыз данын яклаган укучыларга рәхмәт әйтәсе килә. Шулай ук катнашучылар сәяхәтне оештырган район мәгариф идарәсе җитәкчесе Илшат Гомәровка һәм шофер Радик Хайбуллинга рәхмәтле.