Безнекеләрне бел

Узган ел районда укытучылар арасында "Ел остазы" конкурсы үткәрелде.

Анда Рудник урта мәктәбеннән татар теле һәм әдәбияты укытучысы, оештыручы-педагог Гөлүсә Хәсәнова (рәсемдә: сулдан беренче) беренче урынны алды. Аның портфолиосы Казанга сайлап алу турына җибәрелде. Кабул ителгән 50 эш арасыннан 24е сайлап алынды, алар арасында Гөлүсә Илсур кызы да бар иде. Яңа ел башында өч көн дәвамында 7-9 гыйнварда Югары Ослан районында республика финал туры үткәрелде. Биредә конкурста катнашучылар үзләренең визит карточкасын тәкъдим итте, эш тәҗрибәсе белән уртаклашты, класстан тыш чаралар үткәрде.

"Экологик тәрбия формалаштыру" номинациясендә Гөлүсә Хәсәнова дипломант булды. Аңа Татарстан Республикасы Мәгариф һәм Фән министрлыгы дипломы һәм кыйммәтле бүләк тапшырылды.