Җиңү – барыбыз өчен дә уртак

15 августта Җәмигъ мәчете каршында ачылган лагерьга йөрүче балалар район имам-мөхтәсибе Галимулла хәзрәт Яруллин җитәкчелегендә музейда булды.

Музей директоры Ирания Сәгъдиева экспозицияләрдә күрсәтеп, балаларга районның үткәне, танылган кешеләре турында сөйләде. Очрашуга ветеран Фәиз Хәмзин кызы Әлфия Мөхәммәдиева чакырылган иде. Ул әтисе, аның сугыш елларында "Кызыл байрак" газетасы мөхәррире булып эшләвен бәян итте, музейга әтисенең бүләкләрен, документларын тапшырды. Ирания Шиһап кызы Бөек Җиңүнең 70 еллыгына музейда сугыш ветераннарына багышланган күргәзмәләрнең даими яңартылып торуы турында мәгълүмат бирде. Һәркем үзенең туганы - сугышта катнашучы турындагы материал белән музей экспонатларына тулыландыра ала.