Министрлар начар яшәми?

Татарстан түрәләре 2015 елда еллык керемнәре турында мәгълүмат җиткерүен дәвам итә. Халык мәш килеп бакчада казынган, ял иткән арада республика башлыгы Рөстәм Миңнеханов һәм Татарстан Хөкүмәте вәкилләренең былтыр күпме акча эшләве, милке, гаилә әгъзаларының кереме турында билгеле булды. Алдагы ел белән чагыштырганда, былтыр республика түрәләренең кереме 3,7 тапкыр арткан.

Татарстан Президенты Рөс­тәм Миңнехановның кесәсе "саеккан". Узган ел республика башлыгы ике тапкыр кимрәк керем алган. 2014 елда ул 11,8 миллион сум эшләп тапса, былтыр исә 6 миллион сум керем алган. Ә менә хатыны Гөлсинә ханым ел дә­вамында 256,5 миллион сумга баеган. Татарстан Президенты­ның матбугат хезмәте җитәкчесе Эдуард Хәйруллин әйтүенчә, барлык керемнең 210,6 миллион сумы мирас буларак кабул итеп алынган. Гөлсинә ханымның ике җир кишәрлеге, фатиры, кунак йорты, торак йорты һәм машина урыны бар. Татарстан Премьер-минист­ры Илдар Халиков былтыр 5,8 миллион сум керем алган. Ә менә хатыны Гүзәл ханым бер тиен дә акча эшләмәгән. Алдагы елны ул, "Максимилианс" рестораннар чел­тәре милектәше буларак, 3,4 миллион сум керем алган иде.

Татарстан гадәттән тыш хәлләр министры Рәфис Хәби­буллин гаиләсе дә алдынгылар рәтендә. Дөрес, алдагы ел белән чагыштырганда, Хәбибуллин­нар­ның кереме бераз кимегән. Генерал-лейтенант 4,2 миллион урынына 3,3 миллион сум, ә нотариус булып эшләүче хатыны 38,4 миллион урынына 37,8 миллион сум акча эшләгән. Рәфис Хә­бибуллин исеменә берни дә тер­кәлмәгән. Яңа билгеләнгән Татарстан сәнәгать һәм сәүдә министры Альберт Кәримов та төшеп калганнардан түгел.(Ахыры. Башы 2 нче биттә.)

2015 елның декабрендә "Химград" ААҖ Директорлар советы рәисе кәнәфиен алыштырган тү­рә ел дәвамында 29,3 миллион сум акча эшләгән. Татарстан вице-премь­еры Васыйл Шәйхра­зиев­ның да кереме 9,5 миллионнан 12,6 миллион сумга җиткән. Хатыны да тырышкан. 2014 елда аның кереме 2 миллион булса, хәзер 12,7 миллион сум тәшкил итә. Татарстан яшь­ләр эш­ләре һәм спорт министры Владимир Леонов гаи­ләсендә дә байлык арткан. Гаилә башлы­гының кереме алдагы ел белән чагыштырганда- ике, ә менә хатыныныкы 18 тапкыр күбрәк. Ми­нистр ел дәва­мында 10,5 миллион сум акча эшлә­сә, тормыш иптәше 7,4 миллион сум керем алган. Хаки­мият­нең баш­ка вәкил­ләре былтыр 2,6 миллионнан алып 7,5 миллион сум­га кадәр акча эш­лә­гән.

Ә район башлыклары узган ел күпме керем алган?

("Ватаным Татарстан", /№ 64, 06.05.2016/)

http://www.onlinegazeta.info/tatarstan/tatarstan_magazin_vatantat_online.htm