“Кама Тамагы” АХПның Варварино бүлекчәсе кадрлар ягыннан иң нык хуҗалыкларның берсе

Әтисе белән бергә Артем Гундоров та эшли, ул эшнең сыйфаты һәм башкарылган күләме буенча әтисеннән калышмый. Хохловлар гаиләсендә бертуганының улы Николай Хохлов ярдәмче булып эшли.

- Бүген бүлекчәдә культиваторлар һәм тырмалар ремонтлау тәмамланды, запас частьләр кайтканны көтәбез һәм чәчкечләр ремонтлауга керешәчәкбез,- диде бүлекчә җитәкчесе Дамир Сабиров. Әлбәттә, хәзер төп игътибар фермага юнәлтелгән. Узган ел нәтиҗәләре буенча Көрәле сыер савучылары савымны арттырды. Сыер савучы Гөлшат Хәлимуллина беренче урында бара. Хезмәттәшләре Хәмидә Хөснуллина, Илсөяр Равилова да аннан калышмый. Көрәледә тәҗрибәле ферма мөдире Марат Ибраһимов эшләрне төгәл план буенча оештыра. Шуңа күрә биредә яшь үрчем алу да күп, терлекләр үлеме дә аз, сөт саву арткан. 2015 ел йомгаклары буенча хуҗалыкта көненә бер сыердан 4800 килограмм сөт савылган, бу 2014 ел белән чагыштырганда 200 килограммга артыграк. Бер елда 353 яшь үрчем алынган. Уртача көнлек үсеш 703 грамм тәшкил итә.

Шулай да Варварино сыер савучылары яхшырак эшли. Район буенча ел йомгакларына караганда, аларның күрсәткечләре югарырак. Алар арасында алтымеңчеләр дә бар, бу район өчен зур казаныш.

- Атна саен безнең бүлекчә 3200 килограмм сөт тапшыра. Терлек азыгы да җитәрлек. Беренчеләрдән булып силоска кукуруз салдык, сенаж траншеясы да бар, печән, катнаш азык та җитәрлек. Бүген хуҗалыкта 800 баш мөгезле эре терлек исәпләнә, шуның 320се савым сыеры. Тәҗрибәле, хезмәт сөючән һәм җаваплы хезмәткәрләр тырышлыгы белән безнең бүлекчә берничә ел рәттән сөт савып алу буенча алдынгылыкны бирми.