Пост алдыннан

– Бөек пост – күп көнлек постларның иң мөһиме һәм иң борынгысы, бу төп православие бәйрәменә – Гайсә Мәсих терелгән көнгә әзерләнү вакыты, - диде Николай атакай.

– Постны үтәгән кешеләргә нәрсәне истә тоту мөһим?

– Постта бездән җавап һәм тырышлык таләп итә торган өндәүне ишетү мөһим. Мәсәлән, соңгы кисәкне кемгә бирергә дигән сайлау алдында торсак, балабыз, якын кешеләребез хакына без ач тора алыр идекме? Һәм бу мәхәббәт өчен без теләсә нинди корбаннарга әзерме? Пост – дингә ышануыбызның һәм Алланы яратуыбызның шундый ук дәлиле, дога кылу һәм тәүбә итү вакыты.

Пост тәүбә итү өчен җанны нечкәртә. Дәртләр басылгач, рухи акыл алга чыга. Кеше үзенең кимчелекләрен яхшырак күрә башлый, аның вөҗданын чистартырга һәм тәүбә итәргә теләге барлыкка килә. Бөек пост, канатлар кебек, догаларны Аллага җиткерә. Тәүбә итү өчен пост тоту – иң яхшы вакыт.

– Пост вакытында кешеләр нәрсәне онытмаска тиеш?

– Пост тыелган ризыкларны ашаудан баш тарту гына түгел,  без тәүбә итү, тыелу, дога аша күңелебезне чистарту турында да уйларга тиеш? Гайсә Мәсих безгә үрнәк, ул кырык көн чүлдә пост тоткан, аннан көчле рух белән кайткан, дошманның барлык вәсвәсәсен җиңгән. 
Пост һәркем өчен: монахлар өчен дә, гади кешеләр өчен дә билгеләнгән. Ул бурыч яки җәза түгел. Аны коткаручы буларак, һәр кешенең җаны өчен дару буларак аңларга кирәк. «Пост хатын-кызларны да, картларны да, яшьләрне дә, хәтта кечкенә балаларны да үзеннән читләштерми, – ди Изге Иоанн Златоуст. - Ул һәркемгә ишек ача, коткару өчен барысын да кабул итә».

Ләкин постка карата дөрес карашта булмаганда, аның чын мәгънәсен аңламаганда, ул, киресенчә, зарарлы да булырга мөмкин. Пост көннәрен дөрес үткәрмәү нәтиҗәсендә еш кына ярсучанлык, ачулану, түземсезлек яки тәкәбберлек, масаю барлыкка килә. Постның мәгънәсе нәкъ менә шушы гөнаһлы сыйфатларны юкка чыгаруда.

Йөрәк камиллеге һәм тән чисталыгы өчен физик яктан гына түгел, күңел белән дә пост тотарга кирәк. Усал сүз – җан өчен зарарлы ризык, һәм ул шулай ук рәхәтлек бирә. Ачу, тәкәбберлек җанны агулый, һәртөрле яхшылыктан мәхрүм итә, аңа зур җәза китерә.

Постның максаты – җанның зарарлы гамәлләрен бетерү һәм яхшылык җыю, моңа дога һәм гыйбадәт кылу ярдәм итә.

«Авыз гына пост тотарга тиеш түгел, күз дә, колак та, куллар да, бөтен тәнебез дә тыелсын... Пост – явызлыктан арыну, телне тыю, ачуны йөгәнләү, нәфесебезне тыю, яла ягуны, ялганны һәм хыянәтне туктату, - дип изге Иоанн Златоуст. - Пост вакытында авыруларның хәлен бел, зиндандагы тоткыннарны онытма, газапланучыларны кызган, кайгыручыларны һәм елаучыларны юат. Алла синең постыңны кабул итсен һәм тәүбә кылганың өчен мул итеп бүләкләсен дисәң, шәфкатьле, игелекле, тыныч, сабыр бул.