Кимчелекләр төзәтелде

Рөстәм Миңнеханов барлык территорияләрне 12 июньгә кадәр тиешле тәртипкә китерергә кушты. 11 июньдә районда республика телевидениесе эшләде, ул Юрий мәгарәсенең һәм Лобач тавының торышы турында сюжет төшерде.

Телевидение хезмәткәрләренә МР башкарма комитеты җитәкчесе Ринат Заһидуллин интервью бирде.

Аерым алганда, ул Лобач тавы территориясенә андагы тәртип һәм чисталыкны күзәтеп торучы кеше беркетелүе турында хәбәр итте. Сүз уңаеннан, бу территориягә баштан ук экологларның дәгъвасы булмады. Юрий мәгарәсендә хәлләр катлаулырак, әмма монда да күрсәтелгән вакытка тәртип урнаштырылды, чүп-чар чыгарылды, барлык контейнер мәйданчыклары чистартылды.

– Поселокта яшәүчеләрдән бер төркем барлык чүпне мәйданчыклардан чыгарды, - диде поселок башлыгы урынбасары Владимир Сороковнин. - Кызганыч, чүп чыгару мәсьәләсен проект төзүчеләр уйлап бетермәгән. Беренчедән, мәйданчыкның нигезендә зур вак ташлар ята һәм контейнерны мәйданчыктан чыгару бик авыр. Икенчедән, ачык контейнерларга яңгыр суы җыела, шуңа күрә алар ябык тора, ә туристлар, мәшәкатьләнмичә, чүпне алар өстенә өеп куя.
Чүп чыгару проблемасын хәл итү буенча барлыкка килгән кыенлыкларга карамастан, территория күрсәтелгән вакытка җыештырылды. “ТНВ” журналистлары бирегә сәфәрләре вакытында инде җыештырылган территорияне төшерде.

– Җәйгә «Визит-үзәк» коммерцияле булмаган автоном оешмасы табигать территориясен җыештыру буенча килешү төзеде, хезмәткәр чүп тутырылган капчыкларны контейнер мәйданчыкларыннан бункерга ташыячак, - диде башкарма комитет җитәкчесе Ринат Заһидуллин. - Хезмәт биналарын һәм машина кую урыннарын җыештыручы һәм администратор вазыйфаларына вакансияләр бар.

Бүген ике табигать территориясе дә Кама Тамагына кушылган һәм поселокка йөкләнеш берничә тапкыр арткан. Шуңа күрә без районда яшәүчеләргә табигать территорияләрен үзләреннән соң тәртиптә калдыруларын, яр буенда ял иткәннән соң чүп-чар калдырмауларын үтенеп мөрәҗәгать итәбез. Торак пунктлардагы һәм аннан читтәге чисталык – районыбызның йөзе, без барыбыз да моның өчен җаваплы.