Каматамагылылар юбилей тантаналарында катнашты

Ул А.С. Пушкин исемендәге мәдәни үзәктә узды һәм аңа нигез салынуга 10 ел тулуга багышланган иде.

Бүгенге көндә рус милли-мәдәни берләшмәсенең республиканың барлык муниципаль районнарында үз бүлекләре бар һәм һәрберсендә мәдәни кыйммәтләрне, халык байлыгын һәм, гомумән, рус мәдәниятен саклап калу буенча актив эш алып барыла.

-Районның рус милли-мәдәни берләшмәсе максатларының берсе – рус халкының гореф-гадәтләрен саклау, - диде җәмгыять рәисе Елена Сороковнина. - Безнең якшәмбе мәктәбебез бар, анда 10 нан артык бала йөри. Биредә туган якны өйрәнүгә багышланган тематик дәресләр уза.

Районда фольклор коллективлары, вокаль ансамбльләр һәм ике халык хоры эшли, аларның максаты – традицияләрне, гореф-гадәтләрне, мәдәни һәм гаилә кыйммәтләрен саклау.

Бу юнәлештә «Круглый год» АНО актив эшли. Аның әгъзалары мастер-класслар үткәрә, рус халык әкиятләре буенча театральләштерелгән тамашалар уздыра, халык гореф-гадәтләрен яңарталар.

Һәр рус авылында бәйрәмнәр үткәрелә.  Мәсәлән, Красновидовода Троица һәм Алма спасын, Тәмтедә Бал спасын, Мордва Каратаенда Петр көнен билгеләп үтәләр. Авыл халкы һәм кунаклар өчен конкурслар, халык уеннары, концерт программасы һәм сый-нигъмәтләр белән массакүләм күңел ачулар оештырыла.

Бу бәйрәмнәр балаларны рус халкы традицияләрендә тәрбияли. Алар катнашучыларны рухи-әхлакый кыйммәтләргә җәлеп итә, рус мәдәнияте гореф-гадәтләре белән кызыксыну уята.

Бу эшчәнлекнең чиге юк, ләкин алда эш күп: фестивальләр, күргәзмәләр, конкурслар, җәмгыять оештыра торган бәйгеләр республика халкының игътибарын рус мәдәнияте темасына җәлеп итә.