Идел таннары
  • Рус Тат
  • Германия истәлекләре

    (Дәвамы. башы газетабызның 55нче санында) кызыклы замок һәм замок паркы (Шлосспарк)

    Германиянең төньягындагы бик матур провинциал шәһәр Людвигслуст мине үзенең архитектура матурлыгы белән әсир итте. Биредә бик чиста һәм уңайлы. Бүген безнең өчен гадәти көн түгел: без замок һәм замок паркына сәяхәткә барабыз. Ниһаять, безне мекленбург герцоглары резиденциясе замогы каршы ала. Аңа якынлашканда ук тирә-якта бернәрсә дә юк, бары тик ул-зур һәм бөек замок кына булганлыгын сиздем. Без әлеге архитектура корылмасының тарихын белдек, барлык экспонатларны карадык, бүлмәләр буйлап йөрдек. Зур тәрәзәләр, көзгеләр һәм бәллүр люстралар залга тагын да зиннәтлелек өсти. Тәрәзәдән замок паркы күренеп тора, ул 120 га мәйдан били: су киңлекләре көзге кебек ялтырый, 28 километрлы каналдан акрын гына су агып тора, сирәк очрый торган агачлар үсеп утыра. Уңайлы эскәмияләр куелган. Бу матурлыкны күреп гаҗәпкә калдык, замок һәм паркның матур декорацияләре хәтеребездә озак сакланыр. Бу юллардан көн саен җәяү йөрүчеләр бик бәхетледер, мөгаен. Әмма болар без күргәннең барысы да түгел әле. Замокның туры күчәре буенча безгә монументаль шәһәр чиркәве күренеше ачылды. Ерактан ук чиркәүнең символы күзгә ташлана: христограмма-Хи һәм Ро-Христиан исеменең ике грек хәрефе. Чиркәүнең аттикасы дүрт Евангель статуясы белән бизәлгән, алар кеше озынлыгыннан да биегрәк. Безне тышкы күренеше генә гаҗәпләндереп калмады, эчке бизәлеше дә әсир итте, аеруча шуның көтүче булып тууын гәүдәләндергән бик зур картина гаҗәпкә калдырды. Чиркәүгә һәр ял саен кеше күп җыела. Биредә тынлык хөкем сөрә. Күрелгәннәрдән әсирләнеп без яшәү урыныбызга кайттык. Күңел канатлана, кичен кызлар белән пыяла гравировкасы белән шөгыльләнергә булдык (рәсемдә). Бу шөгыль күңелебезгә хуш килде. Без махсус инструмент белән пыяла бокаллардан төрле рәсемнәр кистек. Бик матур килеп чыкты. Башкача булуы да мөмкин түгел, чөнки һаман да күңел күргәннәрдән тәэсирләнә.
    Алсу Гыйлметдинова,
    Кама Тамагы урта мәктәбенең 10 сыйныф укучысы

    Без германия башкаласы - Берлинда
    Иртәнге аштан соң үзебез белән бер-ике бутерброд алып без урамга чыктык. Көн ярау булса да, вакыты белән болытлар арасыннан кояш та күренеп ала. Уңайлы автобуска утырып, тимер юл вокзалына киттек, анда тизйөрешле поезд бер мизгелдә берлинга алып килде.
    Берлинда гына түгел, Германиядәге иң танылган урыннарның берсе, әлбәттә, Рейхстаг. Без шул бик зур корылманы озаклап карадык, истәлеккә фотога да төштек. Берлин Рейхстагы -немец тарихының чын шаһиты. "Немец халкына" дигән язма игътибарны үзенә җәлеп итә, ул беренче Бөтендөнья сугышы вакытында ук барлыкка килгән.
    Башкаланың матур урамнары буйлап барганнан соң Бранденбург капкасына килеп җиттек. Үзенең 220 еллыгын билгеләп үткән бу капка берлин һәм германиянең танылган символы булып тора: озак еллар ул германиянең бүленешен символлаштырса,1989 елдан илнең кушылуын гәүдәләндерә. Берлин классицизмы стилендә төзелгән бу корылма үзенең матурлыгы һәм зурлыгы белән хәйран калдырды.
    Аннан соң Берлин стенасын карадык. ГДР һәм ФРГ турындагы хикәя бездә онытылмас тәэсирләр калдырды. Немец халкының тарихы безнең алда тулысы белән ачылды.
    Төштән соң Европаның үтерелгән еврейлар, нацизм корбаннары истәлегенә куелган мемориалга бардык. Мемориал 2711 турыпочмаклы бетон плитәләрдән торган бик зур кыр, ул берәүне дә ваемсыз калдырмый: әлеге монументаль корылманы күргәч йөрәк кысылып куя. Мәгълүмат үзәгендә террорның нацистик сәясәте һәм бу террорның корбаннары турында күп нәрсә белдек.
    Кичке 7дә арысак та, канәгать рәвештә бу кунакчыл шәһәрдән кайтырга кузгалдык. Бу көн минем хәтердә озак сакланыр, чөнки фаҗигале, тарихлы, кунакчыл шәһәр бездә зур тәэсирләр калдырды.
    Камилла Хәсәнова,Кама Тамагы урта мәктәбенең 10 сыйныф укучысы

    Рәсми кабул итү
    Тагын бер кояшлы һәм шатлыклы көн туды. Иртәдән үк кәеф шәп, чөнки бүген мэриягә барабыз. Бу безнең өчен бик әһәмиятле вакыйга, без Татарстан Республикасы Кама Тамагы район вәкилләре буларак очрашуга барабыз. Безнең делегацияне Людвигслуст шәһәре бургомистры үзе Юртан Райнхарт Мах кабул итте. Ул безгә шәһәрнең тарихы, социаль учреждениеләр, бу тарихи шәһәрнең тормышы, монда бик еш үткәрелүче мәдәни чаралар турында сөйләде. Без аның эш бүлмәсендә булдык, мин хәтта мэр кәнәфиенә дә утырып карадым. Бургомистр никахлашу тантанасы үткәрелүче залны күрсәтте. Очрашуда ихтирам һәм хөрмәт йөзеннән мэрга иске Казан сурәте төшерелгән панно бүләк иттек.
    Шул ук көнне тагын бер кызыклы җирдә булдык. Биредә сырганактан төрле продукция, аерым алганда, хуш исле сабын эшләп чыгаралар. Аларның комплекс тарихы, эшләп чыгарылган продукция турында сөйләүләрен кызыксынып тыңладык. Хезмәткәрләр безне дә сабын ясарга өйрәтте һәм үзебез ясаган продукцияне матур итеп төреп, үзебезгә бүләк иттеләр.
    Кызыклы һәм мавыктыргыч көн рус мәдәнияты кичәсе белән тәмамланды. Без рус һәм татар халкының традицияләре турында сөйләдек, дусларыбызга милли сәнгатьне күрсәтеп җырладык, биедек, шигырь сөйләдек. Аннан соң аларны бәйрәм табынына чакырдык. Кызлар һәм егетләр әзерләгән тәмле борщ, сусыл пилмән, татлы чәк-чәк дусларыбызга бик ошады.
    Айгиз Гомәров,
    Кама Тамагы урта мәктәбенең 9 сыйныф укучысы

    Каноэда йөзү бик күңелле!
    Бүген 28 июль. Иртәнге аштан соң автобус белән Грабов шәһәренә киттек. Барысы да шул кадәр шәп! Бу көнне бормалы елгадан каноэда йөзүгә багышладык. Бу безнең өчен яңалык та, кызык та. Безгә коткару жилетлары, эчә торган су, бутербродлар тараттылар һәм без бер каноэга өчәр кеше урнаштык. Елга агымында ишкәк белән ишеп, төньяк Германия табигатенә хозурланып, үтә күренмәле су өстеннән барабыз. Елга бормаланып акканлыктан пейзаж да үзгәреп тора. Елгада балык сикерә, бәбкәләре белән кыр үрдәкләре йөзеп йөри, бик зур агачларның ботаклары суга салынып төшкән, ә без йөзәбез дә, йөзәбез... 12 км юл узгач ярга тукталдык. Безне анда көтеп торалар иде. Тамак ялгап алганнан соң автобуска утырып " Zebef"ка кайтып киттек. Германиядәге бер көнебез тагын артта калды.
    Чулпан Биккенина, Тәмте урта мәктәбенең 9 сыйныф укучысы

    Нравится
    Поделиться:
    Реклама
    Комментарии (0)
    Осталось символов: