Бәхетне ерактан эзләмәгәннәр

Россиядә традиция буенча Гаилә, мәхәббәт һәм тугрылык көне уңаеннан гаилә нигезләренең ныклыгы белән аерылып торган, уртак хезмәт белән иминлеккә ирешкән, балаларын җәмгыятьнең лаеклы кешеләре итеп тәрбияләгән гаиләләрне хөрмәтлиләр.

Безнең районнан Мөхәммәтшиннар гаиләсе нәкъ шундыйларның берсе, алар авылдашларының хөрмәтен казанган, ә гаилә мөнәсәбәтләре яшь буын өчен үрнәк булып тора.

Россия Федерациясендә Гаилә, мәхәббәт һәм тугрылык көнен үткәрү буенча оештыру комитеты тапшырган грамотада бу парның «Мәхәббәт һәм тугрылык өчен» медале белән бүләкләнүе турында әйтелгән: «Сезнең гаилә берлеге үзара мәхәббәт һәм хөрмәт нигезендә гармонияле никах мөнәсәбәтләренең ачык мисалы булып тора. Сезгә һәм якыннарыгызга бәхет һәм иминлек телибез!».

Мөхәммәтшиннар гаиләсенә «Мәхәббәт һәм тугрылык өчен» медален, шулай ук истәлекле бүләкләрне район башлыгы урынбасары Илнур Гыйниятов, башкарма комитет җитәкчесенең социаль мәсьәләләр буенча урынбасары Елена Сороковнина һәм ЗАГС бүлеге җитәкчесе Елена Халикова тапшырды.

Без дә Фәүзия һәм Мәхмүт Мөхәммәтшиннарны тормышларындагы әлеге мөһим вакыйга белән котладык, алар белән аралашып, бу гаилә турында газета укучыларыбызга да сөйләргә булдык.

Фәүзия Кәлимулла кызы һәм Мәхмүт Җиһангир улы 50 елдан артык бергә гомер итәләр.

Алар 1972 елның мартында өйләнешәләр. Фәүзия Кәлимулла кызы 1970 елда, педагогия училищесын тәмамлаганнан соң ук, Олы Карамал мәктәбендә хезмәт эшчәнлеген башлап җибәрә. Ул үзе тумышы белән Иске Казиле авылыннан, ә Мәхмүт Җиһангир улы Олы Карамалда туып үскән, бу вакытта ул “Большевик” колхозында механизатор булып эшләгән. Яшьләр клубта танышкан, авыл яшьләре кичләрен шунда биергә җыела торган булган. “Ул елларда авылда егетләр-кызлар күп иде, ә интернет юк иде, шуңа күрә биергә чыккач, шәхсән таныша идек”, - дип шаяртты гаилә башлыгы.

Яңа гаилә барлыкка килә, аннан дүрт балалары: өч уллары һәм бер кызлары туа.

Олы уллары Марсель туган авылында калган, ул бар эшкә дә оста, районда аны яхшы беләләр. Элек укытучы булып эшләгән, ә хәзер сак предприятиесендә эшли, әти-әнисеннән ерак түгел шәхси йортта яши.

Мөхәммәтшиннарның уртанчы уллары Мансур Түбән Камада шиналар ясау заводында эшли, гаиләсе белән авылга еш кайта.

Кызлары Әлфия Кама Тамагында яши, социаль фондта эшли.

Кече уллары Эльмир да ерак китмәгән, туган районында калган, ул район үзәгенең полиция бүлегендә эшли.

Фәүзия һәм Мәхмүт Мөхәммәтшиннар барлык балаларына да белем биргәннәр, аларны хезмәт белән тәрбияләгәннәр, гаиләнең һәрвакыт зур хуҗалыгы булган: элек ике-өч сыер, үгезләр, сарыклар, ат һәм йорт кошлары асраганнар һәм аларны карауда беркем дә читтә калмаган.

Балалары үз гаиләләрен корган, һәрберсенең икешәр баласы –  улы һәм кызы бар, ә Фәүзия Кәлимулла кызы һәм Мәхмүт Җиһангир улының 8 оныклары һәм әлегә бер оныкчыклары Рамил бар, быел ул мәктәпкә беренче сыйныфка барачак. Алар һәр оныгын шатландырырга тырышалар, студент оныкларына ярдәм итәләр һәм аларның кунакка кайтуларына һәрвакыт сөенәләр, укулары белән кызыксыналар, уңышларына куаналар, гаиләнең җәлеп итү үзәге булып торалар.

Фәүзия Кәлимулла кызы бөтен хезмәт гомерен мәктәпкә багышлаган, 35 ел математика укытучысы булып эшләгән, шуның 20 елын укыту эшләре буенча директор урынбасары булып хезмәт куйган. "Мин үз эшемне һәрвакыт бик яраттым", - ди ул. Ә Маннаповлар династиясе безнең районда яхшы билгеле. Аның әнисе Гафия Хәйретдин кызы Иске Казиле мәктәбендә укытучы булып эшләгән, алты баласының бишесе, шул исәптән Фәүзия Мөхәммәтшина да әниләренең юлын сайлаган, белем һәм педагогик стаж туплаган.

Мәхмүт Җиһангир улы гомер буе авыл хуҗалыгында эшләгән, техниканы яхшы белә, аның куллары алтын. Зур якты йортында гаилә башлыгының көчле куллары сизелә, ә хуҗабикә биредә уңайлылык булдыра.

Хәзер ир белән хатын пенсиядә, әмма актив тормыш белән яшиләр, бакча эшләре белән шөгыльләнәләр, кәҗәләр асрыйлар, йорт кошлары үстерәләр.

Мөхәммәтшиннар күпләргә үрнәк, алар лаеклы балалар үстергән, барысын да аякка бастырганнар, аларның кунакчыл йортына оныклары еш кайта һәм үзләре өчен үрнәк булган әби-бабаларын бик яраталар.