Азат Сәлимов: “Җәмгыять өчен файдалы буласым килә”

Участковыйлар хезмәтен Эчке эшләр органнары системасындагы төп органнарның берсе дип саныйлар. Участковый гражданнарның иминлеге һәм аларның хокукларын билгеле бер территориядә үтәү өчен җаваплы. Аның төп бурычы – конфликтларны җайлау, ведомствога караган участок адреслары буенча җинаятьләрне булдырмау, шулай ук элек хөкем ителгән, җәмгыять өчен куркыныч затларның һәм социаль яктан имин булмаган гражданнарның яшәү рәвешен контрольдә тоту. Ягъни, алар халык белән турыдан-туры эшләүчеләр. Полиция хезмәткәрләренең берсе турында сөйләргә телибез.

"Кама Тамагы" полиция бүлегенең участок уполномоченные полиция лейтенанты Азат Сәлимов бүлектә ике ел эшли. Бу вакыт эчендә ул район халкы һәм хезмәттәшләре арасында хөрмәт казанды.

Азат Даныш авылыннан, гаиләдә өч баланың иң өлкәне, ә өлкән балалар, кагыйдә буларак, еш кына җаваплы һәм мөстәкыйль булулары белән аерылып тора.

“Ни өчен нәкъ менә әлеге катлаулы һөнәрне сайладың?” дип сорадым. Казан Федераль университетының фундаменталь медицина һәм биология институтын тәмамлаганга, ул бу сорауның үзенә еш бирелүе турында әйтте. Әлеге карарга Азат Россия Федерациясенең Кораллы Көчләре сафларында хезмәт иткәндә үк килә.

«Мөгаен, җәмгыятькә мөмкин кадәр күбрәк файда китерәсем килгәнгәдер, чөнки участок уполномоченные район халкы ихтыяҗларына башкаларга караганда якынрак, төрле закон бозучыларга каршы көрәшә, бәла-каза булган очракта, халык, беренче чиратта, үз участковыена мөрәҗәгать итә», - дип билгеләп үтте Азат Сәлимов.

“Ә хезмәттә иң кыены нәрсә?” дигән сорауга ул: «Полициядә хезмәт итү миңа ошый, һәм мин кабул иткән карарыма үкенмим. Иң кыены нәрсә? Җәмгыятьне яклап, гаиләмне озакка калдырырга туры килә, өйдә бик сирәк булам, соң кайтам, хатыным кечкенә балабыз белән үзе генә. Үз гаиләмә кирәк булган мизгелләрдә еш кына яннарында була алмыйм. Иң кыены әнә шулдыр. Гомумән алганда, хезмәт бик кызыклы, ләкин тулысынча фидакярьлек таләп итә», - дип җавап бирде.

Азат өч ел элек гаилә корган, хатыны Зөлфия белән бер яшьлек уллары Камилне тәрбиялиләр. Зөлфия иренә ярдәм итә, чөнки ул үзе дә күп көч һәм вакыт таләп итә торган катлаулы табиб һөнәрен сайлаган. “Мин офицер хатыны булуым белән горурланам,  полициядә хезмәт итү аңа уңай йогынты ясый, ул бик җаваплы һәм дисциплиналыга әверелде. Хезмәт чорының зур булмавына карамастан, быел тормыш иптәшемнең эш нәтиҗәләре җитәкчелек тарафыннан югары бәяләнде”, - ди ул. 

Хокук саклау органнары гимны ноябрь аенда үзләренең һөнәри бәйрәмнәрен билгеләп үтүче барлык полиция хезмәткәрләренең эшен ачык чагылдыра. Бу, чыннан да, беренче карашка күзгә ташланмый торган, әмма бик катлаулы һәм куркыныч эш. Туганнарның шелтәләве дә, ялларсыз эшләү дә – барысы да бар, ләкин бурыч дигән нәрсә дә бар һәм полиция хезмәткәрләре аны намус белән үти.